ಅಸ್ಸಾಂ ಹಿಂಸಾಚಾರದ ಹಿಂದೆ ವಿದೇಶಿ ಕೈವಾಡ: ಕೇಂದ್ರ ಶಂಕೆ

ಹೊಸದಿಲ್ಲಿ: ಅಸ್ಸಾಂನಲ್ಲಿ ನಡೆದ ಜನಾಂಗೀಯ ಹಿಂಸಾಚಾರದ ಹಿಂದೆ ವಿದೇಶಿ ಶಕ್ತಿಗಳ ಕೈವಾಡವಿದೆ ಎಂದು ಕೇಂದ್ರ ಸರಕಾರ ಹೇಳಿದ್ದು, ಅಂತಹ ಶಕ್ತಿಗಳನ್ನು ಬೇಟೆಯಾಡುವುದಾಗಿ ಘೋಷಿಸಿದೆ. ಅಸ್ಸಾಂ ಸರಕಾರ ಕೂಡ ಹಿಂಸಾಚಾರದ ತನಿಖೆಯನ್ನು ಸಿಬಿಐಗೆ ಒಪ್ಪಿಸುವ ನಿರೀಕ್ಷೆಯಿದೆ.

ಪರಿಸ್ಥಿತಿ ಈಗ ನಿಯಂತ್ರಣದಲ್ಲಿದೆ. ಹಿಂಸಾಚಾರದಲ್ಲಿ ವಿದೇಶಿ ಶಕ್ತಿಗಳ ಕೈವಾಡವಿರುವ ಶಂಕೆ ಬಲವಾಗಿದೆ ಎಂದು ಕೇಂದ್ರ ಗೃಹ ಕಾರ್ಯದರ್ಶಿ ಆರ್.ಕೆ ಸಿಂಗ್ ತಿಳಿಸಿದರು. ಆದರೆ ಆ ವಿದೇಶಿ ಶಕ್ತಿಗಳು ಯಾವುವು ಎಂಬುದನ್ನು ಅವರು ಸ್ಪಷ್ಟಪಡಿಸಲಿಲ್ಲ.

ಕಳೆದ 15 ದಿನಗಳಿಂದ ಹಿಂಸೆಯಲ್ಲಿ ತೊಡಗಿರುವ ಜನರಿಗೆ ನೆರೆಯ ಬಾಂಗ್ಲಾದೇಶದ ಸಂಪರ್ಕ ಬಲವಾಗಿದೆ. ಆದರೆ ಗಡಿಯುದ್ದಕ್ಕೂ ಕಟ್ಟೆಚ್ಚರದ ಕಾವಲು ಇರುವುದರಿಂದ ಹಾಗೂ ಅಂತಾರಾಷ್ಟ್ರೀಯ ಗಡಿಗಳನ್ನು ಮುಚ್ಚಿರುವುದರಿಂದ ವಿದೇಶದ ಸಂಘಟಿತ ಗುಂಪುಗಳು ಇಷ್ಟೊಂದು ವ್ಯವಸ್ಥಿತ ಹಿಂಸಾಕೃತ್ಯಗಳಲ್ಲಿ ತೊಡಗುವುದು ಸುಲಭವಲ್ಲ ಎಂಬುದು ಆರ್.ಕೆ ಸಿಂಗ್ ಹೇಳಿಕೆ.

ರಾಜ್ಯ ಹಾಗೂ ಕೇಂದ್ರ ಸರಕಾರಗಳು ಜನರ ಸಹಕಾರದೊಂದಿಗೆ ಇದರ ಹಿಂದಿನ ಶಕ್ತಿಗಳನ್ನು ಪತ್ತೆಹಚ್ಚಿ ಬಗ್ಗುಬಡಿಯಲು ಬದ್ಧವಾಗಿವೆ ಎಂದವರು ತಿಳಿಸಿದರು.

ಕಳೆದ ಎರಡು ದಿನಗಳಿಂದ  ಬೋಡೋಲ್ಯಾಂಡ್ ಪ್ರಾದೇಶಿಕ ಆಡಳಿತದ ಜಿಲ್ಲೆಗಳಲ್ಲಿ (ಬಿಟಿಎಡಿ) ಎರಡು ಸಮುದಾಯಗಳ ಮಧ್ಯೆ ಮತ್ತೆ ಹಿಂಸಾಚಾರ ನಡೆದಿದೆ. ಚಿರಂಗ್ ಜಿಲ್ಲೆಯಲ್ಲಿ ನಿನ್ನೆ ಐದು ಶವಗಳು ಪತ್ತೆಯಾಗಿದ್ದು, ಪುನಃ ಅನಿರ್ದಿಷ್ಟಾವಧಿ ಕರ್ಫ್ಯೂ ಹೇರಲಾಗಿದೆ. ಬಸ್ಕಾ, ಧುಬ್ರಿ, ಕೊಕ್ರಝಾರ್ ಜಿಲ್ಲೆಗಳಲ್ಲಿ ರಾತ್ರಿ ಕರ್ಫ್ಯೂ ಮುಂದುವರಿಸಲಾಗಿದೆ.

ಇದುವರೆಗೆ ಹಿಂಸಾಚಾರದಲ್ಲಿ 61 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. 5.02 ಲಕ್ಷ ಮಂದಿ ನಿರಾಶ್ರಿತರಾಗಿದ್ದಾರೆ.