ಫಾರ್ಮ್ ನಲ್ಲಿರುವ ಶ್ರೀಲಂಕಾಗೆ ಎದುರಾಗಲಿದೆ ಟೀಂ ಇಂಡಿಯಾ

ಹಂಬಂಟೋಟಾ: ಹೊಸ ಋತುವನ್ನು ಗೆಲುವಿನೊಂದಿಗೆ ಆರಂಭಿಸಲು ಮಹೇಂದ್ರ ಸಿಂಗ್ ಧೋನಿ ನೇತೃತ್ವದ ಟೀಂ ಇಂಡಿಯಾ ಹಾತೊರೆಯುತ್ತಿದೆ. ಆದರೆ ಫಾರ್ಮ್ ನಲ್ಲಿರುವ ಶ್ರೀಲಂಕಾ ವಿರುದ್ಧ ಭಾರತಕ್ಕೆ ಕಠಿಣ ಸವಾಲಿದೆ.

ಐದು ಪಂದ್ಯಗಳ ಏಕದಿನ ಸರಣಿಯ ಮೊದಲ ಪಂದ್ಯ ಇಂದು(ಶನಿವಾರ) ನಡೆಯಲಿದೆ. ಮಾರ್ಚ್ ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಏಕೈಕ 20-20 ಪಂದ್ಯವನ್ನು ಆಡಿದ್ದ ಧೋನಿ ಪಡೆ ಇದರ ಬಳಿಕ ವಿಶ್ರಾಂತಿ ಪಡೆದಿತ್ತು. ಈಗ ಹೊಸ ಹುರುಪಿನೊಂದಿಗೆ ಹೊಸ ಋತುವನ್ನು ಆರಂಭಿಸಲು ಕಾತರಿಸಿದೆ.

ಆದರೆ ಶ್ರೀಲಂಕಾ ಮಾತ್ರ ಉತ್ಕೃಷ್ಟ ಫಾರ್ಮ್ ನಲ್ಲಿದೆ. ಪಾಕಿಸ್ತಾನ ವಿರುದ್ಧ ಏಕದಿನ ಹಾಗೂ ಟೆಸ್ಟ್ ಸರಣಿಯನ್ನು ಗೆದ್ದುಕೊಂಡಿರುವ ಲಂಕಾ ಅಮೋಘ ಫಾರ್ಮ್ ನಲ್ಲಿದೆ. ಆದರೆ ಭಾರತವನ್ನು ಸೋಲಿಸಬೇಕಾದಲ್ಲಿ ತಂಡ ಶ್ರೇಷ್ಠ ಪ್ರದರ್ಶನ ನೀಡಬೇಕಾಗಿದೆ ಎಂದು ಲಂಕಾಗೆ ಕೂಡ ತಿಳಿದಿದೆ. ಭಾರತವನ್ನು ಮಣಿಸುವುದು ಅಷ್ಟು ಸುಲಭವಲ್ಲ ಎನ್ನುವುದು ಜಯವರ್ಧನೆ ಪಡೆ ಅರಿತುಕೊಂಡಿದೆ.

ಐಪಿಎಲ್ ಬಳಿಕ ಎರಡು ತಿಂಗಳ ವಿಶ್ರಾಂತಿ ಸಿಕ್ಕಿರುವ ಕಾರಣ ಆಟಗಾರರು ಹೊಸ ಋತುವನ್ನು ಗೆಲುವಿನೊಂದಿಗೆ ಆರಂಭಿಸಲು ಬಯಸಿದ್ದಾರೆ. ನಮಗೆ ಲಂಕಾದ ಪಿಚ್ ಗಳು ಅಪರಿಚಿತವೇನಲ್ಲ. ನಾವು ಅದಕ್ಕೆ ಎಷ್ಟು ಬೇಗ ಹೊಂದಿಕೊಳ್ಳುತ್ತೇವೆ ಎನ್ನುವುದು ತುಂಬಾ ಮುಖ್ಯವಾಗಿದೆ ಎಂದು ಧೋನಿ ಹೇಳಿದರು.