ಕುಂದಾಪುರದಲ್ಲಿ ಮುಂದುವರಿದ ಮಳೆ

ಕುಂದಾಪುರ,ಆ.8: ಬೈಂದೂರು ವಿಧಾನಸಭಾ ಕ್ಷೇತ್ರದಲ್ಲಿ ನೆರೆಹಾವಳಿಯಿಂದ ಅತೀ ಹೆಚ್ಚು ತೊಂದರೆಯನ್ನು ಎದುರಿಸುವ ನಾವುಂದ ಗ್ರಾಮದ ಸಾಲ್ಬುಡದಲ್ಲಿ ಕಳೆದ ಮೂರು ವರ್ಷಗಳಿಗಿಂತ ಭಾರೀ ಪ್ರಮಾಣದಲ್ಲಿ ನೆರೆ ಹಾವಳಿ ಉಂಟಾಗಿದೆ.

ಸಾಲುಹಾಡ ಮತ್ತು ಬಾಗಿನಮನೆ ಪ್ರದೇಶದ 90ಕ್ಕೂ ಹೆಚ್ಚು ಮನೆಗಳಿಗೆ ನೀರು ನುಗ್ಗಿದ್ದು, ಇಲ್ಲಿನ 400 ಎಕರೆ ಕೃಷಿಭೂಮಿ ಜಲಾವೃತಗೊಂಡಿದೆ. ಬಾಗಿನಮನೆ, ಅರೆಹೊಳೆ ಮೊದಲಾದೆಡೆ ಜನರು ದೋಣಿಗಳ ಸಂಚಾರಕ್ಕೆ ದೋಣಿಗಳನ್ನು ಆಶ್ರಯಿಸಿದ್ದಾರೆ. ನಾವುಂದ ಗ್ರಾಮ ಪಂಚಾಯತ್ ಅಧ್ಯಕ್ಷ ಜಗದೀಶ್ ಪೂಜಾರಿ ಹಾಗೂ ತಾ.ಪಂ. ಸದಸ್ಯ ಮಹೇಂದ್ರ ಪೂಜಾರಿ ಮೊದಲಾದವರು ಸ್ಥಳಕ್ಕೆ ಭೇಟಿ ನೀಡಿ ನೆರೆಪೀಡಿತ ಪ್ರದೇಶದ ಜನರಿಗೆ ಮೂಲಸೌಕರ್ಯ ವ್ಯವಸ್ಥೆಗಳನ್ನು ಕಲ್ಪಿಸಿಕೊಡಲು ಮುಂದಾಗಿದ್ದಾರೆ.

ಇನ್ನೂ ನಾಡಾ ಗ್ರಾ.ಪಂ. ವ್ಯಾಪ್ತಿಯ ಬಡಾಕೆರೆ-ನಾವುಂದ ಸಂಪರ್ಕ ರಸ್ತೆ ನೆರೆನೀರಲ್ಲಿ ಮುಳುಗಿದ್ದು, ಸಂಚಾರಕ್ಕಾಗಿ ಜನರು ಪರದಾಟ ನಡೆಸುವಂತಾಗಿದೆ. ನಾಡಾ, ಚಿಕ್ಕಳ್ಳಿ, ಕಡೆಖ ಮತ್ತು ಬಡಾಕೆರೆ ಸಂಪರ್ಕ ರಸ್ತೆಯೂ ನೆರೆನೀರಲ್ಲಿ ಮುಳುಗಿದ್ದು ಜನರು ಸಂಚಾರಕ್ಕೆ ಸಮೀಪದ ಕೊಂಕಣ ರೈಲು ಮಾರ್ಗವನ್ನು ಬಳಸಿಕೊಂಡಿದ್ದಾರೆ. ಇದಲ್ಲದೆ ಹೆಮ್ಮಾಡಿ ಸಮೀಪ ಸೌಪರ್ಣಿಕಾ ಮತ್ತು ಚಕ್ರಾ ನದಿಗಳ ಸಂಗಮ ಸ್ಥಳದಲ್ಲಿರುವ ಕನ್ನಡಕುದ್ರು, ಮರವಂತೆ ಸಮೀಪ ಕುರು ದ್ವೀಪ, ನಾವುಂದ ಕುದ್ರು, ಕಟ್ಬೇಲೂನಿರಿನ ಚಕ್ರಾನದಿಯ ನಡುವಿನಲ್ಲಿರುವ ಪಡುಕುದ್ರು, ತಲ್ಲೂರು ಸಮೀಪ ಹೇರಿಕುದ್ರು ಮೊದಲಾದ ಕುದ್ರು ಪ್ರದೇಶಗಳು ಜಲಾವೃತವಾಗಿದ್ದು, ಜನರಲ್ಲಿ ತೀವ್ರ ಆತಂಕ ಉಂಟು ಮಾಡಿದೆ.

ಈ ಮಧ್ಯೆ ಸೌಪರ್ಣಿಕಾ ನದೀ ತೀರ ಪ್ರದೇಶದಲ್ಲಿರುವ ನಾಡಾ ಗ್ರಾ.ಪಂ. ವ್ಯಾಪ್ತಿಯ ಪಡುಕೋಣೆ, ಹಡವು, ಗುಡಿಹೊಲ, ಚಿಕ್ಕಳ್ಳಿ, ಕೂಡ್ಗಿತ್ಲು, ಸೇನಾಪುರ ಗ್ರಾಮದ ತೆಂಗಿನಗುಂಡಿ, ಪರಮಕಳಿ ಮೊದಲಾದೆಡೆ ಭಾರೀ ನೆರೆಹಾವಳಿ ಕಾಣಿಸಿ ಕೊಂಡಿದ್ದರಿಂದ ಮಕ್ಕಳ ಸುರಕ್ಷತೆಯ ದೃಷ್ಟಿಯಿಂದ ನಾಡಾ ಮತ್ತು ಪಡುಕೋಣೆಯ ಶಾಲೆಗಳಿಗೆ ರಜೆ ಘೋಷಿಸಲಾಗಿದೆ. ನೆರೆಹಾವಳಿ ಜನಜೀವನವನ್ನು ತಲ್ಲಣಗೊಳಿಸಿದ್ದರೂ ಜನರ ಮೂಲಸೌಕರ್ಯ ಕುರಿತಂತೆ ವಿಚಾರಿಸಲು ಯಾವೊಬ್ಬ ಅಧಿಕಾರಿಯೂ ಭೇಟಿ ನೀಡಿದ್ದು ಕಂಡುಬರಲಿಲ್ಲ.