ಸುಜಾತ ಮಿಲ್ ಕಾರ್ಮಿಕರಿಂದ ಬೃಹತ್ ಪ್ರತಿಭಟನಾ ರ್‍ಯಾಲಿ

ನಂಜನಗೂಡು: ಸುಜಾತ ಮಿಲ್ ಕಾರ್ಮಿಕರಿಗೆ ಸಿಕ್ಕಬೇಕಾದ ಪರಿಹಾರವನ್ನು ನೀಡಬೇಕೆಂದು ಆಗ್ರಹಿಸಿ ಸುಜಾತ ಮಿಲ್ ಕಾರ್ಮಿಕರು ಮಂಗಳವಾರ ಪಟ್ಟಣದಲ್ಲಿ ಬೃಹತ್ ಪ್ರತಿಭಟನಾ ರ್‍ಯಾಲಿ ನಡೆಸಿದರು.

ಸುಜಾತ ಮಿಲ್ ಮುಂಭಾಗದಿಂದ ಹೊರಟ ಪ್ರತಿಭಟನಾ ರ್‍ಯಾಲಿ ಸಾವಿರಾರು ಕಾರ್ಮಿಕರು ವಿ. ರಾಮಸ್ವಾಮಿ ನೇತೃತ್ವದಲ್ಲಿ ಹುಲ್ಲಹಳ್ಳಿ ವೃತ್ತ, ಆರ್ ಪಿ ರಸ್ತೆ, ಶ್ರೀಕಂಠೇಶ್ವರ ಸ್ವಾಮಿ ದೇವಾಲಯದ ಮುಂಭಾಗದಿಂದ ಎಂಜಿಎಸ್ ರಸ್ತೆ, ಮೂಲಕ ರ್‍ಯಾಲಿ ನಡೆಸಿ ಸುಜಾತ ಮಿಲ್ ಮಾಲೀಕರಿಗೆ ಧಿಕ್ಕಾರ, ಕಾರ್ಮಿಕ ಹೋರಾಟಕ್ಕೆ ಜಯವಾಗಲಿ ಎಂಬ ಘೋಷಣೆ ಕೂಗುತ್ತಾ ಸುಜಾತ ಮಿಲ್ ಮುಂಭಾಗ ಜಮಾಯಿಸಿದರು.

14 ವರ್ಷಗಳ ಹಿಂದೆ ಮುಚ್ಚಿದ ಸುಜಾತ ಮಿಲ್ ನ ನೌಕರರು ಅಕ್ಷರಶಃ ಬೀದಿಗೆ ಬಿದ್ದು, ಬದುಕು ಮೂರು ಪಟ್ಟೆಯಾಗಿ ಹಲವು ಕಾರ್ಮಿಕರು ಈ ವ್ಯಥೆಯಿಂದಲೇ ಸಾವನ್ನಪ್ಪಿದ್ದರೂ ಮಿಲ್ ಮಾಲೀಕರು ಪರಿಹಾರದ ಕರುಣೆ ತೋರದೆ ಕಾರ್ಮಿಕ ವಿರೋಧ ನೀತಿ ಅನುಸರಿಸುತ್ತಿದ್ದಾರೆ ಎಂದು ವಿ ರಾಮಸ್ವಾಮಿ ಅವರು ಆರೋಪಿಸಿ ಈ ಧೋರಣೆ ಹೀಗೆಯೇ ಮುಂದುವರಿದರೆ ಉಗ್ರ ಹೋರಾಟ ಅನಿವಾರ್ಯ ಎಂದು ಎಚ್ಚರಿಸಿದರು. ಕಳೆದ 5 ದಿನಗಳಿಂದಲೂ ಮಿಲ್ ಮುಂಭಾಗ ಧರಣಿ ನಡೆಸುತ್ತಿದ್ದರೂ ಸಂಬಂಧಪಟ್ಟವರು ಇತ್ತ ತಲೆ ಹಾಕದೆ ಕಾರ್ಮಿಕರ ನೋವಿಗೆ ಸ್ಪಂಧಿಸದೇ ಇರುವುದು ವಿಷಾದ ಎಂದ ಅವರು, ಕಾರ್ಮಿಕರಿಗೆ ಬರಬೇಕಾದ ನ್ಯಾಯ ಸಮ್ಮತವಾದ ಪರಿಹಾರ ನೀಡಬೇಕೆಂದು ಸಂಬಂಧಪಟ್ಟವರನ್ನು ಒತ್ತಾಯಿಸಿದರು.

ರ್‍ಯಾಲಿಯಲ್ಲಿ ಸುಜಾತ ಮಿಲ್ ಹೋರಾಟ ಸಮಿತಿ ಅಧ್ಯಕ್ಷ ಡಿ.ಕೆ.ಸುರೇಶ್, ಮುಖಂಡರುಗಳಾದ ಸಿದ್ದರಾಜು, ರಾಚಪ್ಪ, ದೇವರಾಜು, ಕೂಸಪ್ಪ, ಲಿಂಗರಾಜು, ವಹಿಸಿದ್ದರು. ಡಿವೈಎಸ್ ಪಿ ವಿಜಯ್ ಕುಮಾರ್ ನೇತೃತ್ವದಲ್ಲಿ ಸಿಪಿಐ ಶಿವಸ್ವಾಮಿ, ಪಿಎಸ್ಐ ರಫೀಕ್ ಪಾಂಡು ವಿಜೇಂದ್ರನ್ ಎಎಸ್ಐ ಸುಬ್ರಹ್ಮಣ್ಯ, ನಾಗರಾಜು ಸೇರಿದಂತೆ ಬಿಗಿ ಪೊಲೀಸ್ ಬಂದೋಬಸ್ತ್ ಏರ್ಪಡಿಸಿದ್ದರು.